Die Suiwer Leer is 'n Afrikaanse Messiaanse webwerf met die missie om die suiwer Woord van God in die kuberruimte uit te dra. Die Suiwer Leer bely die Heilige Skrif soos God dit vir ons bekend maak en soos dit bely word in "Ons Glo en Bely".

Die hoofdoel van hierdie webwerf is om by te dra tot die bekering van die persoon, gesin en Jahshua se gemeente deur die onderrig in, en verdediging van die Skrifgetroue-Messiaanse lewensbeskouing op elke terrein van lewe en denke. Hierdie webwerf is onafhanklik van enige denominasie en dra die suiwer leer van die Woord uit.

Ek beywer my deur Die Suiwer Leer daartoe om die Heilige Naam van ons Elohim, JaHWeH, en van Jahshua Messiah die Seun te herstel. Verder ook om JaHWeH se voorskrifte, maar veral die voorskrifte wat God vir die eerste Messiaanse-gemeentes gegee het, te verkondig. Dan beywer ek my ook daarvoor om alle dwaalleringe en vervalsings van die Christelike godsdiens te bestry en om dit onder Christene se aandag te bring, sodat ons weer kan terugkeer na God se Woord en Hom dan te dien en te aanbid soos wat Hy voorskryf. God het ons al die middele gegee waarmee ons Hom moet dien en skryf duidelik voor hoe ons Hom moet dien. God wil op geen ander manier gedien word nie. Ek verwerp alle mensgemaakte godsdiens of eiewillige godsdiens.

“Die mens sal nie van brood alleen lewe nie, maar van elke woord wat deur die mond van God uitgaan” (Mat. 4:4).